Lalropuii, 29/11/2023
Mental Health chungchang han chhiar zau deuh hian sakhaw hrang hrang lehkhabu thianghlim lamah pawh tun laia kan tawn thil hrang hrang ang hi a lo awm hnem khawp mai.
Zirna In hmasa ber chu chhungkua a ni an ti thin a. Naupang a lo pianin thil hre sain a lo piang lo va. Thu inchuh awm thin mihring zia kan neih hi ‘pianpui nge enkawl dan’ (nature vs nurture)-in a ken tih a ni reng thin. Kum 2022 khan lehkhabu tha tak mai Nature and Nurture (Pianpui leh Enkawl dan) tih a lo chhuak a. Hemi lehkhabuin a tum ber chu mihringin zia kan lo neih chhoh dan hi ‘a zâwk’ awm lovin, pianpui leh enkawl dan hian naupangah ze nghet a tuh thin tih a ni.
Hetiang ngaihdan atang phei chuan nu leh pa atanga zia lo chhawm pawh ni ila, a tlaknain a zir/zir loh dan atangin ze hrisel/hrisel lo chu chhungkuaah kan lo chhawm nung ve zel dawn niin a lang thei ta a. Hun tawn azirin chu zia kan lo nun chhuahpui thin chu a lo lang chhuak ve zel thin a. Hun hahdam leh nuam tawn lai chuan harsa lo têin nun a kal a, nawm pawh a nuam a ni.
Mimal/chhungkuain hun khirh tih a inang lo thei. He hun khirh kan tih theuhte hi chhungkuain kan tawn hian, a paltlang dan tha nia kan hriat thiam theih ang berin hma kan la thin a. Chhungkaw hmalakna te a fuh chuan huhoin tluang takin kan paltlang thei a, hlimna a lo thleng leh thin.
Hun khirh tawn laiin chhungkaw hmalakna te fuh chiah lo a awm ve bawk a. Hmalak ngaihna hriat tawh loh hnuah siam fel tumin nasa takin ngaihtuahna sen a tul thin a. Hetah hian mihring ze ril tak mai – ‘dem tur zawn’ a awl thin a ni.
Kristiante lehkhabu thianghlim Bible-a Eden huan chungchang hi lo en ta ila.
Pathian chuan Ama anpuiin mihring Adama a siam tih kan hmu a. Pathian vek chuan Adama khawhar a hmuhin a kawppui âwm mi Evi a siamsak a. Hlim takin Eden huanah chuan an awm thin a. Rulin Evi a thlem khan Pathianin duhthlanna a pek ngei hmang chuan amah Pathianin ‘hei hi chu ei suh u’ a tih ber kher kha Evi chuan a ei a, Adama a pe a, Adama chuan ama duh thu ngeiin Evi pek chu a ei ta a.
Pathian chu a ngai têin Adama nena inkawm turin a lo kal a. Adama chu a bihruk avangin Pathian nen hmaichhanah an inkawm thei ta lo. Eden huana chengte inlaichinna lo awm sa chuan kawng dang a zawh tan ta a ni. Inlaichinna danglam ta kan hmuh chu – Adama chuan Pathian ‘dem’-in amah awmpui tura a pek ngei khan thing rah chu a pe a, a ei tak thu a sawi a. Pathian chuan engtizia nge ni ta tia Evi a han zawh ve chuan rul chu ‘dem’-in rulin a tihder avanga ei ta a nihzia a hrilh ve bawk a ni.
Kan thil tawn chu eng pawh ni sela, Chhungkaw member-te zinga indemna/inpuh tawnna zâwk hian chhungkaw inlaichinna a tibawrhbang thei thin.
Chhanna dang a awm thei em?
Chhungkuaah eng pawh lo thleng se, indemna/inpuh tawnna aiin ‘Ka ti sual/ ti sual palh a ni’ tiin chhanna kan pe thei zawk ang em le? Hetiang hian Adama leh Evi khan chhanna lo pe ta sela, Pathian rilru a dang daih thei ang em? Eden huana awmte inlaichinna ṭha a nghawng chhuak zawk ang em?
Buaina thar hi a lo awm tak tak em le? Mi dem hi a nuam viau em? ‘History repeats itself’ tih hi a lo dik dawn emaw ni le?
Comments