Lalropuii
20 October 2023
Mental Health kan tih hian rilru hrisel leh nun chhuahpui dana hrisel, a tlangpuiin hlauhna leh nun pangngai ti bawrhbang thei laka fihlim, midangte nena inlaichinna tha neih, nitin nunphung in harsatna a tawn te hmachhawn theihna a kawk thei a ni.
Mental health kan tih hian thinlung, rilru leh khawtlang nun a mi hrisel lam a kawk thei bawk a ni. Mental health chuan kan ngaihtuahna, kan thinlunga kan thil dawnsawn dan leh kan nun chhuahpui dan a nghawng a ni. Hemi piah lamah hian harsatna kan hmachhawn danah hian thui tak a ngawng bawk a, midang te nen ka khawsak ho na ah rah a chhuah bawk a, mimal duhthlanna khawngah a rah a nei bawk a ni. Mental health chuan mihring nun kawng - naupan atanga tleirawl leh puitling nih thleng thui tak ro a rel thei bawk a ni.
Mihring nunah hian rilru leh taksa lama harsatna hi kan tawng ve thin a. Hetianga kan awm hian, kan ngaihtuahna te, kan thinlung put dan te leh kan nungchang te hi a ngawng thin a ni. Mental health a harsatna te hi thil hrang hrangin a ngawng thei a, a then te han sawi ila:
Mihring inthlah chhawn theih thil a awm a, chutih rual chuan thluak hnathawh dan fel hlel a awm thei bawk.
Nun a thil tawn te hian rilru lamah harsatna a thlen thei bawk. Entirnan, mimal, chhungkua leh khawtlang nun nghawng dawt khawpa harsatna a lo thlen te, rilru lama tih duh dahna te, leh taksa lam in ngaisakna te.
Chhungkaw lama rilru lam harsatna lo nei tawh te
A lan chhuah hmasak dan tlangpui:
Mimal mawmawh aia tam lutuk emaw tlem lutuk a mut leh ei te hi a ni thei a
Midang kan kawm thin te leh kan biak thinte lak atanga inlak hranna kan neih te, kan hnathawh leh zirlai ngaihsak aia mahni a awm hnem kan thlan atang te
Hun danga pangai taka kan tih thin te tha thum tak maia kan hmachhawn thin te
Chhan hriat chiah theih si lova na nei anga in ngaih tlat te
Beidawnna riau nei a kan awm leh, beiseina kan neih ve ang thin te pawh beidawng zawnga kan lo dawn sawn / ngaihtuah thin te
Zu in, zial zuk emaw damdawi a pangai ai a kan lo tih tam thut te
Ni dang aia thil theihngilh, thinrim, lungawilo, lungkham leh hlauhna a lo tam tak te
Mahni in tih nat emaw midang tih nat duhna kan lo ngaihtuah/neih tan te
Nitina mahni tih tur tih harsatna kan lo neih tan te
Ngaihtuahna hrisel lo a ni tih kan hriat te paih theih loh na te
Engtiangin nge rilru hrisel kan put theih ang:
Mamawh anga inngaih chuan mithiam te a rang thei ang a rawn thin a tha hle. Zahah leh mualpho naah kan ngaih chuan hriselna kan neih tur ang te kan nei thei dawn lo a ni. Hman deuh hlek laia ‘mi a’ anga kan ngaih dan hi bansan a hun ta hle. Rilru hrisel neih chuan nun a ti nuam a, kan tawn ang apiangah lungawina a awm thin a ni.
Midang te nena nun hona tha neih hi a pawimawh hle a ni. Mihring te hi chengho leh nunho tura Pathian siam kan ni a. Mahni chuaha nun chuan ngaihtuahna ngai leh nun dan ngaia awm reng hi a awl a. Ngaihtuahna hrisel lo a lo luh fuh tawh phei chuan chhuah leh hi a har ve thin a ni. Midangte nena inlaichinna tha kan neih chuan lawmna leh harsatna kan sawia kan inhriat pui hian mimal phurrit hi a lo zang ve huai thei a ni.
Ngaihtuahna hrisel chhawm nun hram hram tum hi a rilru hrisel neihna a ni. Kan dam chhungin rilru ngaihtuahna hrisel tak neih reng chu thil theih a ni lo mai thei. Mihring rilruah hian kan chawm len duh apiang mai hi keimahniah a bet a, a hrisel zawnga kan ngaihtuah luih tlat chuan rei lo teah ngaiah kan lo nei a, ngaihtuahna tha lo kan neih ve thin pawh khan hmun a luah thuk tak tak thei lo. Chuvangin, harsat chang awm mahse mahni duhtlanna in a hrisel zawnga ngaihtuahna hi a chhawm nun ve reng theih a ni.
Taksa sawizawi that hi rilru hrisel nan a pawimawh hle. Taksa sawizawi hian taksa hriselna a hril hle a, chimi piah lamah rilru fim a pe thei a ni. Rilru fim neih tlat chuan thil pawi tak leh mahni tana tha lo chu duhthlanna siam a har ve khawp mai. Taksa chauh leh sawi zawi ngai lo chu ngaihtuahna pawh a chauin chakna neih a har ve thin.
Mi dangte tanpui hian hlimna leh lawmna a thlen thin a ni. Mahni nun harsatna ringawt ngaihtuahna hian kan rilru a ti hnual a, tuar bik riau ni a inhriatna leh mahni inkhawngaihna a thlen hma deuh bik a ni. Mi dang tanpuina hian kan tanpuia te hlimna chauh a thlen emaw kan tih lai hian, mi hlimna thlen theitu kan nih inhriatna khan keimahni ah phurna leh mahni inrintawkna a thlen ve leh a. A hlawkna chu a puitu hian a tel ve leh tho thin a ni. Tin, khawvelah hian keimahni chuah hi harsatna tawk kan ni lo tih inhriatna hian kan harsatna te sukiang vek lo mahse, beiseina that min pe thei a ni.
Mut that hi a pawimawh hle. Kan thluak hnathawh ti tha tur chuan kan taksa hian a mamawh anga chawlh hahdam hi a a pawimawh hle. A tlangpuiin darkar 6 atamga darlar 8 (mimal a zirin) mut kan mamawh a. Kan mutthat theih chuan ngaihtuahna pawh a lo harh tha in, kan hmaa tihtur te pawh hmachhawn thei turin kan inbuatsaih thei a ni.
Nitin/mimal harsatna neih te sut kian dan zir hi damchhunga kan tih tur anih angin thil zir thar kan inhuam hi a tha hle. Kum, thil tawn leh ngaih dan a lo danglam ve zel a, chutiang khawvela kan la awm tlat si avang chuan mimal hian kan phak tawka kan inzir thar ve reng a ngai a ni. Kum sawm kal ta a ka tih dan leh nun phung mila ka awm thin ang ngawt khan vawiin ni a ka thil hmachhawn hi lo hmachhawn leh ka tum chuan a fuh ber thin lo. Internet kan neih hma leh kan neih hnu a kan khawtlang, kohhran, chhungkua leh mimal in kan hmachhawn dan chu sawi sen lovin a danglam tih chu kan hai loving. Chuvang chuan, kan hun tawng a zira kan lo dawnsawn dan tur hi kan zir thar ve reng hi rilru hrisel neih nan a pawimawh hle a ni.
Rilru lam hrisel lohna hi taksa lama harsatna leh hrisel lohna kan tawh ang bawkin kan dam hun chhung hian kan tawk thei theuh a. Nun kawngah hian thil pangngai ve tak a ni a. Thiamna leh ngaihtuahna a lo zau ve zel a, kan thil hriatte a lo bengvarthlak ve zel avang hian zahpui lo kan lo awm tam ve ta hle mai. Thangtharte phei hi chuan pui thei tu tur hi an zawng nasa ve hle a ni. Rilru lam hrisel lohna hi tanpui theih a awm a. Tanpui duh tan chuan tanpuitu an awm a, an dam theih a ni.
Comments