Kristian Chhungkua – Naupang kaihhruaina

Lalropuii

25/3/2024

Ziak hmasa lamah khan Kristian chhungkua a bul atanga din dan tlem kan ti lang tawh a. Khata tang khan tlem thliar sin leh kan tum dawn a ni.

Nau a lo pian atanga kum 18 an lo tlin thlenga awmze nei taka kaihhruai an nih chuan nun an lo hman chhohna turah hian an hun tawng a zira in her rem theihna an nei thei thin. Naupang than lenna tur atana pawimawh thenkhat han tarlang ila.

Naupangin kaihhruaina an mamawhte

1.     Thinlung leh rilru lam :  Naupangte hian an thinlung leh rilru lama thlamuanna hmun leh hun an mamawh hle a. Thlamuanna an hmuh theihna hmasa leh awlsam ber chu an chenna chhungkua a ni. An bula cheng – puitling enkawltute, atangin an phak ang tawkin rinna an nghat a, an zir bawk thin. Mithiamte chuan naupangin thlamuanna an hmuh theihna turin mi pakhat a tawk an ti thin a, a dik viau awm e. Thlamuanna leh himna atan hian a enkawltute khan inlaichinna tha an siam a pawimawh a, naupangin an thinlung leh an rilru a an pai leh ngaihtuahna an neih ang ang te an sawichhuah ve theihna hun siam a tha hle. An thusawi ang ang te kha lo ngaihthlak a, a dik hlel deuh a awm anih pawhin a sawitu dem mai lo va, kawng hrisel zawk kawhhmuh kha a enkawltute chuan tum a tha a ni. Hemi chungchangah hian chhungkua pawh tan tlana, chhungkaw ngaih dan pawh sawi ho thin a tha hle ang. Naupang thinlung leh rilru lama hrisel hriat theih dan awlsam ber chu an mahni, an phak tawka inrintawkna an neih hi a ni. An nun kaihruaitu tura ze duhawm ber pawl hi chhungkua atanga neih tan a ni.

2.     Taksa lam: Ram leh khawtlangin nun dan thar leh ze thar a tawn chhoh tak zelah hian, taksa hian a hrisel leh a hrisel lo lam pawh a tawng chho ve mawlh mawlh mai a. Thinlung leh rilru hrisel nei tur hian taksa hrisel neih hi a kawng pakhat chu a ni. Ei leh in kan hmuh theih te, taksa insawizawina kan hmuh theih dan te, inchhung mamawh kan hmachhawn dan te, a lo danglam ve ta hle mai. Kan ka, rilru, mit leh beng a tlai ang hian, taksa lampang hi a hrisel zawngin a tlai em aw? Taksa hriselna lam atana naupang mamawh – insawizawina tur – infiam, inchhung chet, inchhung lam mamawh an phak ang tawk tih tir thin te a pawimawh khawp mai. Infiamna lam erawh hmun kan neih dan a in ang lo hle ang a, a theih ang anga taksa chet theihna tur naupang enkawltute hian ngaihtuah chhuah theih a hlu hle ang. Pawn lama taksa sawizawina pek a rem chiah loh pawhin inchhung lama chet tam tir hi a tha khawp mai. Hmasawnna in a ken tel pakhat zawm theih atana tha ve deuh chu inchhung chetah hian mipa tih tur leh hmeichhe tih tur thliar loh hi a ni. Kan tum ber chu taksa sawi zawi anih avangin eng hna pawh kha a hmei a pa in tih kha a tha viau a ni.

3.     Eizawnna lam: Mihring puitlinga inchherna atana langsar tak mai pakhat chu eizawnna nei thei tura inchher hi a ni. Hmasawnna kan ti dawn nge eizawn theihna kawng hrang hrang a lo awm takah hian naupang lo la puitling tur te hma khua leh kaihhruai hi naupang enkawltute’n rilru sen a tha khawp mai. Tun ang laiah mi rawn tur te an tam tawh a, social media leh internet te pawh kan hmel hriat hle a, tlema han inrawn zau deuh chuan naupang puihtheihna lai tur chu a lo lang ve thei mai dawn a ni. Eizawnna him leh him lo, ram leh kohhran tana buaipui awm lo lam zawnga eizawn theih dan kan sawi ve fo hian puitling an lo nih huna an eizawnna thlan kawngah thui tak a kaihruai thei dawn a ni. Mizorama inzir ngai deuh mai pakhat chu – eizawnna atana hna kan thawhah hian ‘tih tak zetna’ (work-ethics tha) kan mamawh hle. Lehkhazir a ni emaw, infiamna lam emaw, kut themthiamna lam a ni emaw tih tak zeta naupangin a tum chuan hlawhtlinna a awm thin a ni. Social media, tv leh internet nena eizawnna kan kal kawp tir chuan rilru tak tak a hnathawh a har hle a, kan hnathawh in a tuar thei thin a ni. Hna thawh hun, social media hun, tv hun leh internet hman hun te hi naupan lai atanga zirtir a, puitlingin kan insum bawk chuan, hun rei lo te chhungin an lo zawm ve thei a. Puitling an lo nih hunah chuan hnathawh hunah hnathawh nachang an lo hria ang a, a ruaitu tan leh a enkawltute tan an lo thlamuanpui awm mai dawn a ni.

4.     Khawtlang/chenhona: Veng leh kohhran hrang hrang te inrelbawl dan danglam em em lo mahse tih dan phung in ang lo a lo awm ve thin a. Kan awmna veng leh lawina kohhran kalphung pangngai zawm hi a himna lai a awm a ni. Khawtlang leh kohhran tana tangkai nih theih dan leh len hnu pawha mi hnawksak nih loh dan te in hrilhhriat a pawimawh hle mai. Naupangte chuan inchhung lama khawsak tha an hriat hnem chuan pawnlam leh social media vela an thuhriatte lo thliar fel dan an thiam chho ve zel dawn a ni. Thu leng vak – hrisel si lo leh khawtlang leh kohhran tana fel hlel tak tak a awm ve reng si a, naupang tan a eng bera kha nge zawm tur tih hriat a har ve thin a ni. Puitlingte hian social media leh internet te hi kan buaipui a ni tih hi pawm a ngai hlein a hriat a ni. Kan dan theih loh thil anih avangin a hman tangkai dan te, khawtlang leh kohhran tana tangkai zawnga hman dan kan hriat zau deuh pawh a ngai ta hle mai. A tangkai zawnga hman dan chhungkua a kan zir thar chuan tu tan pawha hlawktlang tak mai hmanrua a ni thei.

5.     Nuam tih zawng lam: Naupang than lenna kawngah hian tuipui zawng an rawn nei chho ve a. Hetah hian an mahni enkawltute nen ngaih dan leh tul tih dan a in ang lo awl ve em em a. Hman laia pawimawh leh ho mai mai a kan lo ngaih kha, tunlaiah chuan a lo pawimawh ve hle thei a ni. Naupang enkawltute hian kan ngaihdan ni chiah lo mahsela kan enkawla te tuipui zawng anih chuan sawi puia, an tuina kan hriat thiam sak a, remchang kan zawnpui a tha hle ang. Hei hi a pawimawhna chu – hun khirh leh harsatna tawh lai hian naupan lai atanga thiam thil/nuam tih zawng (hobby) lo neih khan a chhan nasa em em a ni. Dam chhungin a hlim reng theih lo va, min puitu tur a neih reng theih lo va, hun khirh leh zamawm tak te hmachhawn dawnin mahni a tan lak ngaihna tam tak a awm. Hemi hunah hian kan tuipui zawng kan lo tih than thin khan kan rilru, taksa leh thinlung lam te a lo tichak thin dawn a ni. Harsatna siamtu lian tak pakhat – ngawlveina chi hrang hrang lakah min veng thei a ni.

Zirna in, khawtlang, kohhran leh tlawmngai pawl hrang hrangte chuan naupang leh rawlthar/tleirawl te mamawh ang theih tawkin han hlui mahse, chhungkaw lama enkawltu leh thutlukna siam thei tu te nen a tan ho anih loh chuan nun ngialnghet zirtir chhuah chu a har deuh thin a ni. Puitling, naupang enkawltute hian kan hun, kan ngaihtuahna, kan phak tawk angin puitling hrisel chherchhuahna kawngah hian hmalak chhunzawm zel i thlang ang u.