Depression

Lalropuii, PhD

Nov 6,2021

(He thuziak a kan tarlan tur te hi American Psychiatric Association siam Diagnostic and Statistical Manual of Mental Disorders (DSM-5), Fifth edition. 2013 behchhana ziah a ni.)

Depression tih thumal hi kan hre zing ta hle mai a. Kan hriatchian a pawimawh hle mai. Depression hi medical natna chikhat, kan ngaihtuahna te, kan thinlung put dan te leh kan nun dan te a chhe zawnga min nghawng thei a ni. Vanneihthlak takin a enkawl theih a, a natna neitu in dam duhna a neih chuan dam tha takin a nun a hmang chhunzawm thei thin a ni. Depression chuan lungngaihna leh/emaw nuam tih thin zawng te thlauhthlakna te a awm thin a ni. Hei hian thinlung leh taksa lama harsatna a thlen thin a, in lam leh hnathawhna lamah te harsatna a thlen thei thin a ni.

Kan sawi tawh angin Depression hi medical natna anih avangin a lo lan chhuah dan leh a enkawl dan pawh hi fimkhur tak chung si a hriatthiam a pawimawh hle. Depression lan chhuah dan leh tawrh dan hi a han palzam mai theih atangin enkawl vat ngai angin a then theih awm e. A lo lanchhuah dan tlangpui te chu:

• Lungai/ hnual/ hlim thei lo

• Nuam tih thin te phur pui thei tawh lo

• Thil eithei lo/ ei chakna nei lo – ei leh in avanga rihna tlahniam emaw rihna pung thut

• Mut theihlohna / mut reng duhna

• Tha za lo/ chauh hluah hluahna

• Mamawh leh tul vang nil ova taksa che reng (thu reng thei lo, kal kual reng, kut tuai reng) emaw chauh tak maia tawng chhuak emaw che thin (hei hi chenpui emaw midangin emaw an lo hmuh/hriat theih khawpa lang)

• Mahni inthiam lohna leh tling lo ni a inhriatna

• Ngaihtuahna fim thei lo, thil pakhata rilru pe thei lo/ duhtlanna siam mumal thei lo

• Mahni inthahduhna emaw ngaihtuah nei thin  

A chunga kan sawi te hian kar hnih ai a rei a daih chuan mithiam te rawn ngei a tul a ni. Chutih rual chuan medical condition dang – thyroid te, brain tumour te leh vitamin tlakchhamna te hian depression ang dinhmun a awm theihna a thlen thei a. Heng harsatna te hi kan nei ani tih kan hriat chuan doctor te hnena in entir hmasak phawt a tha a ni.

Kum khatah hian depression hi kumtling mi 15 ah hian 1 in vei anga chhut a ni a. Chu lo leh ah chuan mi 6 zingah hian mi 1 in depression hi an dam chhung hunah hian nei ngei a chhut a ni bawk. Depression hian kum bithliah bik a nei lova, amaherawh chu a tlang puiin mi kum 17 atanga kum 25 velah hian a lo lang tan hmasa thin a ni. Mipa ai chuan hmeichhia te hian depression hi an lo tawng nasa zawk a ni. Zir mi te chuan Hmeichhe zingah hian hmun thuma thena hmun khat te hi chuan an dam chhung hian vawikhat tal chu major depressive episode hi an lo tawng thin a ni an ti.  Inthlahchhawng atang hian za a sawmli hi inthlahchhawn theih niin an hria a ni.

Depression hi nun phung pangngaia lungngaihna kan tawn thin nen a in ang lo a ni. Kan lam hnaih tak te thihna avang te, hna kan chan avang te leh nupa/inngaihzawnna kawnga inlaichinna kan chan te hi hun khirh tak ni thinin lungngaihna min thlentu ni mahse kal chhuah hun kan nei tlangpui thin a ni. Hetiang hunk an tawh hian lungngaihan te leh han sunnah un te kan nei a, kan sun hun chhung a rein a rei lo thei bawk. Mihring anga kan lo dawn sawn leh hmachhawn dan inang lo mahse kal chhuah hun a awm thin a ni. Hetianga awm chhung hian mi tam tak chuan ka ‘depressed’ kan ti thin a ni.

Amaherawh chu hlim lohna kan neih thin leh depression hi a in ang lo a ni. Thihna avanga lungngaihna te neih te hi mimal in dawnsawn dan a in ang lo va. Hetiang ang tuarna leh lungngaihna te hi a ni tur ang tak pawh a ni, amaherawhchu depression nen a ngaih zawm theihna turin a lanchhuah dan hi a in an chang a awm bawk a ni. Lusun tawrh dan leh depression hian lungngaihna thuk deuh leh kan thil nuam tih thinte tih chhunzawm peih lohna te in a awm theih bawk.

• Major depression ah chuan kar hnih emaw a aia tam chhung chu nuam tih thin te pawh nuam tih tawh lohna a awm thin

• Mahni inngaihhniamna leh mahni inhuatna nei hi a awl hle bawk a

• Ngaihtuahnaah mahni nun hial lak duhna a lo awm thei a, an natna hi tuar chhuak thei lo tur anga in ngaih a awl em em a ni

Depression hian mi tu pawh hi a ngawng thei a. Mi nun pangai a nung mek te pawh hi a ngawng thei a ni. Thil tam tak hian depression hi a thlen thei a, thenkhat han sawi ila:

• Biochemistry: Thluak a chemical awm te hian a thlen theia sawi a ni

• Genetics: Depression hi chhungkaw inthlahchhawn theih a sawi a ni. Entir nan: phir zirna ah chuan phir pakhat in depression a neih chuan a phir pui chuan a nun chhungin za a sawmsarih in depression neihna chance a nei a ni an ti

• Personality: Mahni in ngai hniam thin te, harsatna hmachhawn thiam lo te, emaw thil a chhe lam zawnga thlir thin te hian depression an nei hma deuha hriat a ni

• Environment: Hleihlenna chi hrang hrang tawng hnem te, retheihna in a chenchilh te hi mi tam tak ai chuan depression hi neih a awl deuh bik a ni

Engtiangin nge Depression hi kan enkawl theih ang?

Rilru lam natna ah chuan depression hi enkawl hma chuan 80% -90% te hian enkawlna avangin an dam leh thei a ni. Enkawlna dawng zingah chuan an vai deuh thaw in an harsatna atangin hma an sawn tih theih a ni bawk. 

Depression diagnosed leh enkawlna lak anih hma hian psychiatrist leh general practitioner te hian uluk takin an en ang a. A tul dan a zirin taksa lam pawh enchain a tha khawp mai. Mi thenkhat ah chuan thisen test hi an mamawh thin a. Depression hian medical lam harsatna a ni lo tih hriatchhian phawt a ngai a ni. Entir nan, thyroid emaw vitamin tlakchhamna avanga depression a ni lo tih kha chian phawt a ngai a ni. Uluk taka exam anih chuan depression kha enkawl dan phung tha takin a duan theih a ni. Chumi ruala pawimawh deuh deuh te chu chhungkaw member zingah nei an awm leh awm loh hriat a, awmna velah harsatna dang a awm leh awm loh te hriat a ngai bawk a ni. Chutianga hriat anih chuan enkawl dan tur tha ber a lo lang thei ang a, a hun takah depression chu enkawl a ni ang a, damna a lo thleng mai dawn a ni.

Damdawi: Tluak lam hnathawh avang pawhin depression a awm theih avangin psychiatrist te in entir a, damdawi an chawh ang te a hun leh ei tur an tih zat ei ngei a tha a. Damdawi hian depression symptoms tam tak chu kar hnih khat hnuah a ti reh thei a ni. A then tan chuan hun rei a ngaih thin avangin a damlo te mamawh dan ang zela doctor rawn fo tur a ni.

Psychotherapy: ‘Talk Therapy’ an tih mai hi mimal mamawh dan a zirin lak tel ngei a tha bawk a ni. Damdawi nena a tankawp hian a damlo tan hmasawna a awm awl bik a ni. Therapy ah chuan mimal rilru ngaihtuahna kal fuh lo te siam rem a ni thin a, chuvangin damlo te kha an dinhmun leh an harsatna thlen thei tu thil tam tak enkawl a ni thei a ni. Rilru leh awm dan harsatna an neih te kha damlo te tana kawng tha zawk a lo awm thei a, chu chu therapy ah hian an zir ve bawk thin a ni. Therapy ah hian mimal a enkawl a awm theih laiin, nupa emaw chhungkua a enkawl tel theih a ni a. A damlo in a mamawh angin hei hi chu a siam rem theih a ni. Hetiang anga enkawlna damlo khan a dawn chuan hun lo la kal leh zel tur atan pawh depression lak atangin a vengin lo in enkawl dan pawh an hriatthiam theih phah thin a ni. Depression enkawlna hi a mimal a zir anih em avangin hun a duh rei dan hi a in ang lo thei a. Hmasawna awm tur hian  a thenin  kar rei lo te an mamawh laiin a tam zawk chuan session 10 atanga 15 te an mamawh thin a ni. Hmanhmawh vut vut chi a ni lo.

Electroconvulsive Therapy (ECT) hi medical atanga enkawlna a ni a, damdawi leh psychotherapy enkawlna in hmasawnna a thlen theih lo chuan hman a ni ve bawk thin. Hei hian thluak a fel lo awm te kha electric hmanga han khawih zeuh ang kha a ni mai a. Uluk taka doctor in a enkawl a ngaih avangin damdawiin atanga enkawl a tha ber a ni.

Puitheih dan leh hmachhawn dan tlangpui:

A damlo te tana natna tur belhchhhah lova, an mamawh ang a mithiam rawn tura fuih te, hruai te, leh chhungkaw lam harsatna awm thei tur te lo enfel sak te hi an mamawh hle. An chenna/awmna/chet tlatna hmun hian tak takah chuan an natna sut kian sak pui kawngah hian kawngro a su hle a ni. Infuihna te hi a hlawk e mem a ni.

Rilru lam natna hi taksa dang natna ang tho anih avangin zah ah lak tur a ni lo va. Enkawlna tha dawn chuan a tam zawk hi a dam theih a ni. Enkawl hma phei chu a tha lehzual. Chuvangin kan khawtlangah hian a tam zawka titi a, harsatna nei ni a kan hriat te chu fimkhur taka ti ti pui a, a enkawl thei tute hnena hruai hi a hlu hle a ni. Rilru lam harsatna neih hi thil zahthlak a ni lo va, thup chi a ni lo. Dam theih anih rual hian enkawl loh anih chuan natna tuar hrehawm ber pawlah a chang ve thei tho a ni. Tin hun rei a lo nih tawh phei chuan enkawlna dawng mahse damna tur chuan hun a lo duh rei tawh dawn a ni.

Enge kan mamawh tak?

Mahni leh mahnia in enkawl thiam dan zir/zirtir a tha hle. Depression symptoms te hi zawi zawiin a tih tlem ve theih avang hian hriat hma a tha hle a ni. Thil awlsam leh kan tih theih te tlem han sawi ila:

• Taksa sawi zawi – hei hian taksa leh rilru lam nasa takin a pui a. Exercise la tha chuan a taksa chauh leh zawi tur kha chakna a pe thei a, rilru lam pawh hlimawm zawng leh beiseina a pe thei a ni. A hranpa a exercise lak kher hi a ngai lova, inchhung sekrek khawih leh in lama chhungkaw mamawh te kan lo tih hian nitina kan taksa mamawh ang chu kan lo lakhawm ve thei a ni. Chet tum tlat chuan mahni leh mahni innawr chhuah hun a awm ve thin a ni. Damlo te hi hnathawk peih loh emaw hnathawk duh lo tawp anga ngaih a awm thei. Chhuanlam a hman a awm theih laiin a tam zawkah chuan damloh vang a ni tih kha kan hre thar leh dawn nia.

• Mut that – kan taksa leh rilru lam hian hahchawlh na hun a mamawh a. Chumi atan chuan mut hi a pawimawh hle a ni. A tuk leh lama kan thawh tur ang te kan thawh that theih nan leh kan ngaihtuahna te fim taka kan hman theih na a pawimawh hle. Depression hi ngaihtuahna atanga lo piang ve thei anih avangin kan thluak hnathawh that theih ber dan tura kan lo tanpui hi a pawimawh a ni. Thinthi diai a mut hi regular taka kan tih theih chuan harsatna tawk em em lovin kan hun tawn tur te kan hmachhawn thei dawn a ni

• Eitur hrisel ei – kan ei leh in hian kan taksa a ngawng theih zia chu kan hre theuh awm e. Sawi dan pakhatah phei chuan ‘kan nihna hi kan ei leh inah a innghat’ an lo ti hian a ni. Kan taksa a kan lak luh apiang hian kan taksa ah a hrisel zawngin emaw a hrisel lo zawngin a ngawng vek a. Kan ka a kan lakluh hi kan fimkhur a ngai hle. Kan duh zawng chauh kan lakluh te, tam lutuk emaw tlem lutuk emaw kan lak luh hian kan taksa tan a tangkai lo thin. Chumi bakah a chhe lam zawngin a thawk thei bawk. Kan ei leh in hian kan rilru sukthlang a ngawng nasa ve hle a, keimahniin kan hrethiam mai lo anih pawhin dietician te maw hetiang lama mithiam te rawn a tha hle.

• Zu in loh/in tlem – zu hian kan mood a tih hniam theih avangin rilru lama harsatna hril thei a ni. Zu in loh hian depression symptoms a ti tlem thei a ni. Chumi piah lamah lo in rei tawh leh in nasa chuan a tawpah hian rilru lam harsatna an tawk duh khawp mai. Zu avanga depression nei anih phei chuan a enkawl dan leh a hun chhung kha a ti rei duh em em a ni.

Tlangkawmna:

Depression (emaw taksa leh rilru lam damlohna chi hrang hrang) te hi mahni a lo in ngaih ‘self-diagnosed’ chi a ni lo. Mithiam te rawn hmasa lo a, ti ti phung lenga ‘depression ka nei’ ‘ka depressed’ tih ang chi te hi hman tam loh a tha hle mai. Mihring nunphung a awm ve lungngaihna te hi kan pawm a ngai hle. Hun tawng khirh bik lai a awm a, kan nun dan a ngawng nasat leh a ngawng rei chuan kan in entir ngei a ngai a ni. A tawp berah chuan, harsatna hi mimalin lo dawnsawn dan a in an thin loh avangin kan lo dawnsawn fuh loh chang a awm pawhin, mahni in dem mai lovin, tanpui thei tu pan mai hi kan tan a hrisel ber a ni.

Mi zawng zawngin kan tih theih chu – lungngaihna leh manganna nei ni a kan hriat chuan an insawi thawl theihna hun emaw kan siam sak a, an thusawi duh te  NGAIHTHLAK SAK tura rilru kan pek hi a tawk em em a ni. Solution pek kher a ngai lova, kan hun leh ngaihthlakna thinlung khan a tidam thei em em a ni.